نلتقي اليوم على سفرة .. ندى أدم و ...

طاجن بامية بالريش الضاني

عزائى...أهلاً بكم وأكلتنا البيتى..
العدد دا قولت أقولكوا على أكلة كلنا بنحبها وبيتى فى الصميم وخاصة انها متوافرة طازة ويانعة فى السوق الأيام دى وطول الصيف وهى البامية...طبعاً كلنا بنحب البامية على الطريقة المصرية بتاعتنا الحميلة..بس المرة دى حبيت اقولكوا عليها لما بنعملها طاجن وكمان بالريش الضانى المعتبرة...
أنا باحب البامية البلدى ..طبعا باجيب البامية الطازة وباغسلها كويس وبعدين بابدأ أقمعها ...باشيل القمع من فوق على هيئة مخروط وأقطع جزء صغير من نهايتها يعنى للشكل الجمالى ومعظم الناس بتفتح البامية من النص انا مش بافتحها علشان متتهريش وبافضل أستمتع بمنظرها وهى سليمة وغرقانة فى الدمعة وعلشان كدة برضو انا بانقى البامية الصغيرة ومابحبش البامية الكبيرة ..

بعد ما قمعتها باغسلها تانى كويس...وبسيبها فى مصفة تتصفى
باخد فص مستكة مع شوية حبهان تشويح فى شوية سمن بلدى او زيت ..الريحة بتبقى جميلة..بانزل الريش تتحمر على الوشين مع شوية فلفل أسود وبعدين باضيف مية شوية بشوية مش كتير علشان أضمن الطعم الواضح للحم وكمان مع شوبة بصل متقطع..وأستنى عليها لغاية لما تقرب تستوى واروح شايلاها من الأناء بحيث يتبقى عندى شوية شوربة صغيرن اضبط الملح بتاعهم بعد ما أصفيهم...
فى نفس الإناء باشوح البامية على خفيف برضو فى المادة الدهنية المفضلة عندكوا سواء كان زيت أو سمن...وبارفعها من الإناء وباحط مكانها بصلة صغيرة مفرومة تتشوح وبعدين أنزل عليها بحوالى معلقة كبيرة توم مفروم..أنا باتكلم ف مقادير كيلو لحم وكيلو بامية...المهم بعدما التوم والبصل اتشوح وبقى لونه أصفر هاحط عصير الطماطم الفريش وهاسيبها تتسبك كويس ..بعد كدة هاحط البامية مع حوالى معلقتين كبار فلفل أحمر طازة مدقوق وفلفل أسود ورشة حبهان وأسيبها على النار لغاية لما تغلى مرتين تلاتة وبعدين هاجيب طاجن هاحط فيه نص كمية البامية وبعدين هاحط الريش وبعدين أكمل بالبامية وأغطى بالشوربة وأضبط الملح وأدخل الطاجن جوا الفرن على درجة حرارة 200 لمدة ساعة تقريبا لغاية لما البامية تستوى والوش يتحمر والصوص يقل...
هنا ممكن باجهز برضة فصين توم متشوحين مع معلقةكسبرة ناشفة ومطفيين بمعلقتين خل وذرة ملح وفلفل..بمجرد ما الطاجن يطلع من الفرن سخن نرش عليه التتبيلة دى بيبقى طعمها حلو جدا وهى اختيارى عموماً...وممكن نستغنى عنها ونحط عصير الليمون....وعلى فكرة ممكن يتعمل باللحم الموزة...اللحم البلدى..اللحم المفروم...اللحم الضانى العادى مش بالضرورة الريش..لكن الريش أنا لافضلها لأن بتكون شايلة حتت دهن ضانى واللى بيدى للبامية طعم حلو جدا..ويارب يكون عجبكوا الطاجن.

وعلشان الأكلة تفتح النفس أكتر باحب أعمل معاها بتنجان وفلفل مقلى بالخل والتوم..

باجيب البتنجان العروس..بافتحة من النص وباقلية والفلفل الأخضر برضو

وباكون محضرة دقة عبارة عن فلفل أحمر وتوم وكمون وملح وليمون وممكن نحطشوية شبت أخضر بيدى طعم حلو...بعد القلى باحشى البتنجان والفلفل من الدقة دى وبارصه فى طبق
متغطى بمزيج من الخل المخفف بشوية ميه وملح وكمون..واللى يحب يستغنى عن الخل ممكن...دى حسب التذوق..
ونفس التتبيلة ممكن نعملها مع الطماطم واسمها الطماطم المحشية ...بنفتح الطماطم بالعرض طبقات متتالية بحيث تكون فى النهايةمش منفصلة وماسكة فى بعضها والطمطماية وحدة واحدة وباحشى الطبقات دى بخليط الدقة وبرضو باحطها فى الخل والتوم والملح..

طبعا باجهز رز بالشعرية بالسمن البلدى...