PostHeaderIcon رسالة للأبنودى

ركن الثقافة - ثقافة

مالك يا عبرحمان
ليه تعوج الميزان
ما كنت زى النخل شامخ مرتفع
ليه تنخفض
ايه اللى غير لهجتك
ايه اللى لون سحنتك
ايه اللى خلاك تنسى طعم دمعتك


ما تقول لى يا أبنودى مالك
ايه اللى غير حالك
دا انت بتاع الفقرا
والناس الغلابة
عمرك ما خفت من الديابة
شايل سلاحك غنوتين وجناح ربابة
كنت نصير المعدمين
شايل هموم المظلومين
وغنوتك كانت عشان المحتاجين
ما تقولى بس ايه جرى لك
ايه اللى غير حالك
نسيت حراجى
والحاجة فاطمة
وأبوسماعين
دانت بنيت فى السد
شفت المعجزة
وفى السويس شوفت الجيوش العاجزة
فاكر حمام
وريس غزالى
والأيدين المنجزة
مش دول صحابك
دا انت ابن طمى النيل وانات الصعيد
ازاى تبص ع البلد بصت بعيد
مانتش غريب
دا انت زمان صانع نشيد
وانت اللى كاتبه
وملحنه بتوبه الجديد
الله يسامحك قدر ما حزنت قلوبنا
ويداوى جرحك قدر ما فرغت جيوبنا
وها اقول لك ايه
عدى النهار
والمغربية خلفت دمعة لوهيبة
ومات الشجر وماعادش ناكل برتقان
مالك يا عبرحمان
ليه تعوج الميزان
اوعاك تكون نخيت مع وجع الأنين
او تهزمك زحمة سواعى او سنين
خليك كما كنت امين