PostHeaderIcon واحد وطن .. حكاية

ركن الثقافة - ثقافة

jpgلو هنحكي الحكاية
لازم نحكي م الأول
عن ناس بتتحرك فى نص العصايا
وناس تاهت فى لعبة الاستغماية
وناس بجرى وراها
وناس بتجرى ورايا
مولد وناس بتهرج
وقرود بتتخانق على صباع موز
وناس بتتفرج
على الأراجوز
مراجيح
طراطير
وقرون متعلقة ع الحيط
ضد الحسد ياعبيط
وكبرت وعرفت يعنى إيه ديوس
لما تشوف الوطن مهروس
وتتطاطى
ع الأيادي تبوس
وتبقى زيهم
مُرتشى
على مُنتشي
على هِشهِشي
وتعيش حياتك
كَلْبِشي

لو هنحكي الحكاية
لازم نحكي م الأول

عن ناس راكبة العجل لفَّة
وناس سايبة نفسها تتشفَّى
بقت لحم من غير عضم
وحطت عضمها ف قُفَّة
ماتعلموش المشي
وسابوا عمرهم لخيوط
وهما لسه ف اللفَّه
...
يابياعين العنب ف السوق
هحط عمري ف الكفَّه
قصاد برقوق عيون البت
واسيب حضنها دفَّه
توديني تحت هدومها
واتدفَّا
وَاحكي الحكاية م الاول
من يوم ماحفِّيت شفايفها حتة حفَّه
ورَقَصْت فوق وسطها بخفَّه
ساعتها قالتلي
يلا بقى
شيلني على حصانك
وديني للزفَّة
...
ف وسط المولد كانت هدف تنشين
وكنت انا العجلاتي
والناس راكبة العَجَل لفَّه
ضاعت البت
وانكسرت ف إيدي الدَّفَّه

لو هنحكي الحكاية
لازم نحكي من الاول

من لحظة حب بين اتنين
او لحظة كُره بين عَشرة
الحكاية بتعتمد ع العِشرة
بين الاسد واللبوءة
وأشبال
نوم الاسد علمها الكسل
وانتظار النحل ييجي بالعسل
مش هييجى
مش هيقرصنا
لأن ف قرصته موتُه
النحل تاريخ اتعلم يدوسنا
عشان قفلنا كراريسنا
النحل بطل ياكل
وبطل يغازل الورد بسنانه
وبطل يبقى حارسنا

لو هنحكي الحكاية
لازم نحكى من الاول

لازم نعرف
أُمِّنَا ليه بقت غولة
وعيالها طول الوقت مشغولة
راكبين زراير
الألعاب بتلعبهم
وألعباهم
اللى كانت حقيقية
ع الرف مركونة
...
مرسومة ف الشوارع
لعبة الأولى
مجرد صورة
لواد وبنت
يتنططوا
ويظغَّطها الغرام
وتظغ!َطوا
وجوا بعض يبطبطوا
دلوقتي بقى المشهد شات على فيس
والعاب العصر تلعبنا
وكإننا في حكاية
بتكتبنا مش بنكتبها
وحتى اما لعبنا استغماية
الكل تاه
ومحدش لاقى حد ف الحارة
ولا ف البيت
ولا تحت السرير مع البت
استخبيت
عن عيون أمى وامها
ولا قَطَفْت من عنيها العنب
ولا عِرِفْت طعم السُّكْر ف حضنها

لو هنحكي الحكاية
لازم نحكي م الأول

كان جدى فحل
وقوى
علمنى ماابقاش قوى
دلعنى فوق عِمِّتُه
واتْلَفِّت عليا الضلمة
واما وِقْعِتْ شمعتُه
نادى عليا مسمعتوش
عاش يومه
ماشفتوش
ولاعرفت إيه حصل
وبُكره
كنت انا
تحت العِمَّة من غير ملامح
عقل اندش زى البصل
على الطبلية
ماكلتوش
زي الأكل مغشوش
وازاى بتحبها
بعد مابِعْت ف عرضها
...
وازاى سايبين تاريخنا للتلطيش
على قفا الواد اللى قال مش جاي
لغاية اما البت قالت مايهمنيش
زِهْقِتْ رومانسية
وشُرب حشيش
والإحتلال
لسه ف أرواحنا مامشيش
...
وازاى تقول فيها إنَّ
دى إن بتنصب المبتدأ
حرب ضد الظلم مايجيش
وبترفع الخبر
هنعيش

حكيم عيووون